یکشنبه - ۲۴ شهریور ۱۳۹۸
صفحه اصلی / مقالات / احمد اوبالی: دیرلی قارداشیم فرامز اکبریانین عزیز خاطیره سینه

احمد اوبالی: دیرلی قارداشیم فرامز اکبریانین عزیز خاطیره سینه

 فرامز قارداشیملا (دوکتور فرامز اکبریان ۱۹۴۹-۲۰۱۹) بیرینجی دفعه ۱۹ ایل اؤنجه فرانسانین استراسبورگ شهرینده آذربایجانلیلارین توپلانتیسیندا تانیش اولدوم. میللی حرکاتیمیزین گله جه یی ایله باغلی درین دوشونولموش بیر دانیشیغی اولدو. ایجلاسدا ایشتیراک ائدنلرین هامیسینا مثبت تاثیر بوراخمیشدی. آخشام اونونلا بیرلیکده بیرآز صؤحبت ائدینجه، لندن شهرینده موعللیمچیلیک ائتدیگینی اؤیرندیم. تبریز یونیوئرسیته سینده کیمیا(شیمی) اوخویوب و داها سونرا اینگیلتره ده نووه فیزیک (فیزیک هسته ای) بؤلومونده دوکتورلوق آلمیش، آراشدیرما مرکزلرینده چالیشمیش و نهایت موعللیمچیلیکله مشغول اولدوغونو دئدی. بو گؤروشوموز بیر قارداشلیغین باشلانقیجی و داها سونرا وطن یولوندا موباریزه میزین دوامیندا داهادا گوجلو اولماغیمیزا سبب اولدو، گوناز تی وی آچیلدیقدا ان چوخ سئوینن و دستک وئرن آذربایجانلیلاردان اولدو، آوروپایا یولوم دوشنده مومکون قدر گؤروشوب و فیکیر موبادیله سی آپاراردیق، دوزگون و صمیمی فیکیرلرینه گؤره ان آغیر گونلریمده اونونلا مصلحتلشردیم، عؤمرونون ان بؤیوک آرزوسو وطنیمیزین آزادلیغی و بیرلیگی اوچون دوشمانلارلا موباریزه سی اولسادا، سون ایللرده خرچنگ (سرطان) خسته لیگی ایله موباریزه ائتمه یه مجبور قالدی، آمما هر زامان آذربایجان دئییب دیری قالدی، و ۱۳ ایل خرچنگ اونا دئییل، او خرچنگ خسته لیگینه قالیب گلدی، یاخیندان و اوزاقدان فیزیکی ساغلاملیغی حاققیندا خبرلشردیم، آمما گونلر کئچدیگجه بللی اولوردو کی طبیعتله موباریزه ائتمک او قدرده آسان دئییل،

 3 آی اؤنجه یئنه ده خسته خانایا دوشدویونو اؤیره نیب و بیر گونلوکده اولسا ۱۴ دکابر ۲۰۱۸ جی ایلده لندن شهرینه گئدیب یاخیندان بیر داها اونونلا گؤروشدوم، فرامز قارداشیملا سون گؤروشومده فیزیکی اولاراق ضعیفلشمیش اولسادا، گوجلو ایراده سی ایله دانیشارکن میللی حرکاتیمیزین گله جک ایللرینه پیلانلاردان، گونازتی وی نین گله جه ییندن و ساییره مسئله لردن چوخ دانیشدیق. من اوزولمه ییم دئیه ” تبریزه گئدیم و سونرا آمئریکایا گله رم چوخ دانیشاریق” دئدی و نهایت آیریلدیق، آرزو ائدیردیم کی سون گؤروشوموز اولماسین، آمما بو گون اؤیرندیم کی فیکیر و جان قارداشیم تبریزده سون نفسینی چکیب دونیادان کؤچموشدور، روحو شاد و یولو داواملی اولسون،

اونون خاطیره سی ابدی اولاراق اوره ییمده دیری قالاجاق، گوجلو ایراده سی، درین فیکیرلری، وطنیمیز آذربایجانین آزادلیغی و ایسته یی ایله صمیمی اینسان دوکتور فرامز اکبریان هر زامان خاطیره یادداشیمدا یاشایاجاقدیر.

احمد اوبالی

شیکاگو ۱۲ مارت ۲۰۱۹ 

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *