هر بیر توپلومسال حرکت، بیلگی ایله دوشونجه تمللرینه دایانمالیدیر. بیلگیسیز یاخود دوشونجهسیز بیر حرکتی دوشونمک اولماز. تاریخی، ادبی، فرهنگی، سیاسی … بیلگیلره دایاناراق، عین حالدا میللی بیر دوشونجهیه آرخالاناراق، آذربایجان میللی حرکتی سون چاغلاردا گونوگوندن داها آرتیق گلیشمکده، داها آرتیق گئنیشلنمکدهدیر.
آذربایجان یازیچیلاری ایله آراشدیرماچیلاری، اؤزللیکله سون ۳۰ ایلده، گونئی آذربایجان قونوسوندا گؤزهگلیم بیر لیتراتور اولوشدورماغی باشارمیشدیرلار. بونا باخمایاراق، منجه حرکتیمیزده لاپ گؤزه چارپان بوشلوقلارین بیری “آکادمیک آراشدیرمالار بوشلوغو”دور. بو بوشلوغو دولدورماق دا آذربایجان اؤیرنجیلرینین هابئله آکادمیک اوزمانلارینین بوینونا دوشر.
سون گونلرده استانبولدا گونئی آذربایجانلی بیر دوقتورلوق اؤیرنجیسی ایله گؤروشدویومده، ایلک سوروشدوغوم سورغولارین بیری، هانسی قونودا تئز (پایاننامه) ایشلهمک ایستهدییی اولدو. آلدیغیم یانیت هئچ ده اومدوغوم کیمی دئییلدی. آذربایجانی جاندان کؤنولدن سئودییینه باخمایاراق فیکرینده اولان تئز قونوسو آذربایجانلا هئچ ده ایلگیلی دئییلدی!
گونوموزده، آذربایجانچیلارین آذربایجان سئوگیسینی یالنیز دوستاقلاردا ساودیقلاری گونلرین ساییسی ایله اؤلچنلر وار. بو فیکره قاتیلا بیلمهسم ده، آذربایجان سئوگیسینی یالنیز کؤنوللرده یاشاتماغا تام قارشییام. منجه، بو سئوگی بیزیم یاشاییشمیزا، دوشونجهمیزه، چالیشمالاریمیزا…یؤن وئرمهلیدیر.
بوگون، بوتون آذربایجان اؤیرنجیلری هابئله آکادمیک اوزمانلاری ایستر آذربایجانیمیزین گونئیینده اولسون ایستر قوزئیینده، ایستر تورکیهده اولسون ایستر دونیانین هر هانسی بیر اؤلکهسینده، گونئی آذربایجان قونوسوندا اوزلشدیییمیز بو “آکادمیک آراشدیرمالار بوشلوغو”نو دولدورماغا چابا گؤسترمهلیدیر.
بیز گونئی آذربایجانین سیاسی، اقتصادی، حقوقی، تاریخی، ادبی، هنری، توپلومسال… مسألهلری حاققیندا آکادمیک بیر لیتراتور اولوشدورمالیییق. بئلهلیکله ده یوخاریدا وورغولادیغیم بوشلوغو دولدوراراق، بیلگی ایله دوشونجه تمللرینه دایانان بیر گلهجهیی میللتمیزه هابئله میللی حرکتیمیزه قازاندیرمالیییق.