گاماج جبهه آزادی ملی آذربایجان جنوبی
گونئی آزربایجان میللی آزادلیق جبهه‌سینین آزربایجان دوولتی و سیلاحلی قوه‌لرینه دستک بیاناتی
۱۹۸۸-جی ایلده ائرمنیستان طرفینین آزربایجانین تاریخی تورپاقلارینا قارشی آچیق شکیل‌ده اراضی ادعالاری و ائتنیک زمین‌ده تخریباتلاری ائرمنیستانین آزربایجانا قارشی حربی تجاووزو ایله نتیجلنیب و آذربایجان اراضی‌سینین ۲۰ فایزی ایشغال ائدیلیب.حربی تجاووز دؤورون‌ده ائرمه‌نی اوردوسو ایشغال ائتدیکلری رایون و شهرلرده حربی و مولکی شخصلر آراسین‌دا هئچ بیر فرق قویمادان دینج اهالینی آمان‌سیزلیقلا قتله یئتیریب و آزربایجانلیلار ائتنیک تمیزله‌مه و سویقیریما معروض قالیبلار.
۱۹۹۳-جو ایلده بئینلخالق صولحون و تهلوکسیزلیین اساس تأمینات‌چی‌سی کیمی چیخیش ائد‌ن ب.م.ت تهلوکه‌سیزلیک شوراسی ائرمنیستانین آزربایجانا قارشی ایشغالچی سیاستیله باغلی ۸۲۲، ۸۵۳، ۸۷۴ و ۸۸۴ سای‌لی دؤرد قتنامه قبول ائدیب. قطعنامه‌لرده آزربایجان اراضیلرینین ایشغالی پیسلنیلیب، گوج تطبیقی واسطه‌سیله اراضی ادعالارینین رئاللاشدیریلماسینین قبولئدیلمزلیگی وورغولانیب، آزربایجانین اراضی بوتؤولویو، سووئرئن‌لیگی و سرحدلرینین توخونولمازلیغی بیر داها تصدیق ائدیلیب و ایشغالچی قوه‌لرین آزربایجانین ایشغال اولونموش بوتون اراضیلرین‌دن درهال، تام و قئید-شرط‌سیز چیخاریلماسی طلب اولونوب.
لاکین، بئینلخالق قطعنامه‌لره محل قویمایان تجاووزکار ائرمنیستان اؤز ایشغالچی سیاستینی داوام ائتدیرمک‌ده‌دیر و زامان-زامان آزربایجانین ایشغال اولونموش اراضیلرین‌دن علاوه دیگر سرحد بؤلگه‌لرین‌ده ده گرگین‌لیکلر یارادیر. ۱۲ ایول ۲۰۲۰-جی ایل تاریخ‌ده ائرمنیستان سلاح‌لی قوه‌لری آتشکس رئژیمینی پوزاراق ائرمنیستان و آزربایجان دؤولت سرحددینین توووز رایونو ایستیقامتین‌ده آزربایجان سلاح‌لی قوه‌لرینین مؤقعلرینی توپلارلا آتشه توت‌دو. بو حربی تجاووز، ائرمه‌نی ایشغال‌چیلارینین آزربایجان اراضیلرین‌ده داوامئدیجی ایشغال پلانلارینی، همچینین آزربایجانین بئینلخالق ایستراتئژی اهمیت‌لی ائنئرژی و لوگیستیک شبکه‌لرینی تهلوکه آلتینا سالماق مقصدیله باشلادیلان تخریبات‌چی پلانلارینی گئرچکلش‌دیرمه جه‌دی‌دیر.
آزربایجان اوردوسونون ائرمنیستانین حربی تخریباتلارینا لاییق‌لی جاواب وئرمه‌سینین آردیندان آزربایجانین پایتاختی باکی شهری باش‌دا اولماقلا، گونئی آذربایجانین موختلیف شهرلرین‌ده، ایران حکومتینین تهلوکه‌سیزلیک قوه‌لرینین جدی تضییقلرینه باخمایاراق، آذربایجان دؤولتینه و اوردوسونا دستک مقصدیله کوتلوی آکسییالار تشکیل اولونوب. مینلرله آزربایجان تورکو آزربایجان تورپاقلارینین مدافعه‌سی اوچون میللی-حربی سفربرلییه حاضر اولدوقلارینی بیان ائدیبلر. ائرمنیستانین تزاووزکار عمللرینه جدی اعتراضلارینی بیل‌دیره‌ن گونئی آزربایجان‌دا یاشایان آزربایجانلیلار «قاراباغ آزربایجان‌دیر!»، «ائرمنیستانین ایشغالچی سیاستینه سون قویولسون!» شوعارلارلار ایله آزربایجان رئسپوبلیکاسینین آلی باش کومان‌دانین میللی سفربرلیک فرمانینی گؤزلدیکلرینی و مینلرله کؤنول‌لو بو سفربرلییه قوشولماق ایستدیکلرینی گوناز تی وی، سوسیال مئدیا و همچینین گاماج-آ عنوانلادیقلاری مراجعتلرله بیلدیرمیشلر.
بونونلا یاناشی دونیانین موختلیف اؤلکه‌لرین‌ده ائرمنیستانی حربی تجاووزونه قارشی کئچیریله‌ن سیویل و ایجازه‌لی آکسییالار تشکیل ائدیلیب.
بیز گونئی آزربایجان میللی آزادلیق جبهه‌سی (گاماج) اولاراق میللتیمیزین وطن نامینه میللی بیرلیک و ائرمه‌نی ایشغالین‌دا اولان تورپاقلاریمیزین آزاد ائدیلمه‌سینه قوشولما ایستیینی آلقیشلاییریق و بیلدیریرک کی، گونئی آزربایجان‌دا یاشایان میلیونلارلا آزربایجان‌لی میللی سفربرلیک امرینی گؤزلییر. شوبهه‌سیز کی، بو سفربرلیک اعلان اولوندوغو حال‌دا یوز مینلرله آزربایجان‌لی کؤنول‌لو اولاراق بو ساواشا قوشولاجاق و وطنیمیز آزربایجانین اراضی بوتؤولویو و موستقیلیینی سونا قدر قورویاجاق‌دیر.
گونئی آزربایجان میللی آزادلیق جبهه‌سی
۷ مرداد ۱۳۹۹ – ۲۸.۰۷.۲۰۲۰
