صفحه اصلی / مقالات / میللی حرکت و ایچیمیزده وار اولوشان بسیجی‌لر – مسعود هارای

میللی حرکت و ایچیمیزده وار اولوشان بسیجی‌لر – مسعود هارای

ایل‌لر بویو ظولمه أسیر دۆشن بیر توپلوم، ایستر ایسته‌مز ظالیمین قوردوغو قورغولار’لا اوغراشیر و او قورغولارا آلیشقان اولور. عینی حالدا ظالیم‌لره قارشی آپاردیغی مۆجادیله‌ده، آسئمیلاسیونا معروض قالدیغی اۆچۆن، مۆباریزه تمل‌لرینده، ظالیمه اوخشار تاوورلار، داورانیش‌لار’لا اۆز-اۆزه قالیر.

آذربایجانین میللی حرکتی ایسه بو تاوورلاردان اوزاق دورمامیشدیر. زامان-زامان عئینی تاوورلاری بیر باشا یانسیلاییب، میللی حرکت ایچینده گؤز اؤنۆنه گتیرمیشدیر.

اؤرنک اۆچۆن، تهران حاکیمیّتی ایچینده بویا باشا چاتان آتش به ایختیارلار، زامان-زامان آذربایجانین میللی حرکتی ایچینده‌ ده اؤز ماهیت‌لرینی گؤسترمکده‌دیلر.

بو اؤرنه‌یین ثبوت ائتمه‌گی اۆچۆن، هئچ بیر ایش گؤرمه‌یه چابا گؤسترمه‌ین، ساتقین، خایین تانیق قوروم‌لاری آد آپارماق اولور. داها دیقت‌’له باخسانیز، تهران حؤکومتینده‌کی واویلا ایسلام ائدن گئتدی، واویلا اینقیلاب یاد أل‌لره دۆشدۆ کیمی تاوورلار، تأسسۆف‌له آذربایجانین میللی حرکتی ایچینده ده گؤز اؤنۆنه چیخماق باجاریغینی ألده ائتمیشلر.

کئچن آیین ایچینده “اؤزۆمۆز” پروقرامیندا دوکتور صادق زیبا کلام‌-ی پروقراما قوناق چاغیردیق. پروقرامین ایلک یاریم ساعاتیندا بللی اولمایان نه‌دن‌لردن دولایی، بیزیم‌’له باغلانتی‌سی کسیلدی. پروقرامدان همن سونرا ایرانشهری دۆشۆنجه‌سینه باغلی اولان‌لار، زیبا کلام پان تۆرک‌لره ساتیلدی، زیبا کلام خائیندی، زیبا کلام مۆحاکیمه اولمالیدی، مملکت ایسلامی ایران‌دان قووولمالی دیر واویلا دئیه‌رک سانال دۆنیادا یازماغا باشلادیلار. بو دویغوسال و قاباریق تپکی‌لر، حاکیمیّت پان تۆرک‌لرله ألی بیر کاسادا دیر دئین‌لر ده آز اولمادی.

بو اولایدان همن سونرا میللی حرکته منسوب اولان بیر قیسم همین واویلا دۆشۆنجه‌سی ایله بیزی (#محمد_رحمانی‌فر، #مسعود_هارای) پان ایرانسیت‌لره ساتیلدیغیمیزی، حؤکومت‌له ألیمیز بیر کاسادا اولدوغونو بیان ائتدیلر.  بو اولای ایچیمیزده اولان آتش به اختیار بسیجی‌لرین وار اولدوغونا بیر ثوبوت دیر.

حال بو کی میللی حرکتین أساس فلسفه‌سینده دیکتاتورلوغا، زوراکی‌لیغا قارشی ساواشماق و عئینی حالدا دیکتاتورلوقدان، زوراکی‌لیقدان اوزاق دورماغی أساس بیلمیشدیر. بو فیکیرله هر کیم راضیلاشا بیلیر کی، میللی حرکت بیر دیکتاتورلوغو ییخیب، باشقا بیر دیکتاتورلوغو اینشاء ائتمک ایسته‌میر.

پولاریزمه اینانماییرساق، قبوللانمالی‌ییق کی گئت-گئده اینشاء ائتدیگیمیز حؤکومت، ایندیکی دیکتاتور تهران حاکیمیّتی‌ایله قیل وورمویاجاقدیر.

دَگرلی فیکیرداش‌لار، بیز ایسارتدن قورتولماق اۆچۆن، اؤزگۆرلۆگه گئدن یولو سئچمیشیک‌سه، بیر آز دا اولسا بیر-بیریمیزه اینانماق، بیر-بیریمیزین یانیندا دورماغی، دوست‌یانا تنقید ائتمه‌یین دوغرو یول‌لارینی تاپماغا چابا گؤسترمه‌لی‌ییک. بیر اولوب یومروق اولاق دئمیرم، آنجاق اورتاق نؤقطه‌لرده بیر-بیریمیزین یانیندا دورماغی اؤیره‌نک. ایچی بوش سؤزلرله، گیزلی آدلار آرخاسیندا دۆشمانجاسینا گیزلنمک یئرینه، اولدوغوموز کیمی گؤرۆنمکدن قورخمایاق. 

بیر ذئهنیتی دَگیشمک اۆچۆن ایلک اؤنجه بیر-بیریمیزه دۆشمان گؤرۆنتۆله‌ین ذئهنیمیزی دَگییشمه‌لی‌ییک. توتدوغوموز یول اوزون، اینجه و چتین بیر یول دیر بیلیرم. او اۆزدن اؤز ألیمیزدن آلان یارالاریمیزین سایی، دۆشمن ألیندن آلدیغیمیز یارالارین سایی‌سیندان چوخ گؤرۆنۆرسه، دئمک یانلیش بیر یولدان گئدیریک و بو یانلیش یول بیزی دۆز مقصدیمیزه آپارا بیلمه‌یه‌جکدیر.

 بیر چوخ زامان میللتیمیزین سعادتی، میللی منفعت‌لری اۆچۆن، ذئهنیمیزی بئله دَگیشمه‌لی‌ییک. بیز توتدوغوموز یول، بیز بیلدیگیمیزلر دوغرو دیر دئیه توتدوروب دورمامایاق. آرخامیزدا هارایلایان آذربایجان گنج‌لیگی‌نین سسینی ائشیتمکده، اونلارا دردلشمکده، اونلارین قایغی‌لارینی بیلمکده خئییر وار.

بو گۆن آذربایجان گنج‌لیگی میللی حرکت قوروم‌لارینا بیر چوخ یئرلی تنقیدلری وار. ائشیکده‌کی‌لر، ایچه‌ریده‌کی‌لری دویماییرلار، ائشیتمه‌ییرلر دئییرلر. من اؤز آغلیما بو تنقیدلرین بیر چوخونو یئرلی گؤرۆرم. تنقید آدینا بیر بیریمیز’له دالاشماق، دولاشماق یئرینه، آرخامیزدا گلن آذربایجان گنج‌لیگی‌نین تنقیدلرینه و اؤنوموزده‌کی اوزون و اینجه یولو نئجه گئتدیگیمیزی دۆشۆنمه‌لی‌ییک.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *