GAMAC Güney Azərbaycan milli azadlıq cəbhəsi
Türkiyədən olan məşhur baş məşqçi Mustafa Dənizli 19-cu super liqa yarışlarında Təbrizin “Traxtur” futbol komandasını çalışdıracaq.
Müqavilə iyunun 13-də “Traxtur”un Türkiyədəki ofisində klubun sahibi Məhəmmədrza Zenuzi, icraçı direktoru Qulamrza Sadiqiyan və Mustafa Dənizli arasında imzalanıb.
“Traxtur” klubunun açıqlamasına görə, müqavilənin müddəti bir ildir, lakin 19-cu super liqa yarışları başa çatdıqdan sonra tərəflər arasında razılıqdan asılı olaraq bu müddət uzadıla bilər.
Bəzi Türkiyə saytları müqavilənin 5 illik olduğunu yazıb. Lakin klub tərəfindən açıqlanan məlumat bu xəbəri təsdiq etmir.
Bununlada Corc Likenzlə müqaviləni ləğv edildikdən sonra Güney Azərbaycan klubunda yaşanan qeyri-müəyyən vəziyyət başa çatdı, artıq klub güclü oyunçular cəlb etməyə başlaya biləcək.
Yeni baş məşqçinin iyunun 17-də Təbrizə gələcəyi gözlənilir.
Mustafa Dənizli “Traxtur” komandasının xarici vətəndaş olan 9-cu baş məşqçisidir. O Ərtoğrul Sağlamdan sonra “Traxtur”la müqavilə bağlayan ikinci türkiyəli mütəxəssisdir.
70 yaşlı Mustafa Dənizli son olaraq ölkəsində “Kasımpaşa” klubunda çalışıb. O bundan əvvəl Türkiyənin milli komandası, “Qalatasaray”, “Beşiktaş” və “Fənərbaxça”, Azərbaycanın “Xəzər Lənkəran” və İranın “Perspolis” və “Tehran Pas” komandalarını çalışdırıb.
